De littera E SHOW APPARATUS
178 | Inter Externum et hesternum. Hesternum dicimus pridianum, externum autem extraneum, hoc est, alienum. |
179 | Inter Eloquentem et loquacem. Sinceritas facundiae eloquentum est, effusa et incondita temeritas, loquacium. Unde est Sallustius: Loquax magis quam facundus. Et Cicero: Hunc loquacem esse habitum, nunquam dissertum. |
180 | Inter Expertem et expertum. Si enim expertum rerum dixerimus, significamus peritum, si expertem, ignarum. |
181 | Inter Exercitatum et exercitum. Exercitus, laboribus fatigatus, exercitatus, vel arte, vel studio peritus. |
182 | Inter Exosum et odiosum. Exosus dicitur qui aliquem odit, odiosus, qui oditur. |
183 | Inter Ebrietatem et ebriositatem. Quod ebrietas aliquando est, ebriositas frequens temulentia vini est. De qua Apostolus ait : Neque ebriosi regnum Dei possidebunt. Pulchre autem quidam non ignobilis orator, cum ebrium e somno describeret excitatum, ait: Neque dormire excitatus, nec vigilare ebrius poterat. Qua sententia expressit quodammodo nec mortuum eum fuisse, nec vivum. |
184 | Inter Eventum et eventa. Eventus ipsa res est, Eventa autem dicuntur quae ab eventu veniunt. |
185 | Inter Egestatem et paupertatem. Quod egestas peior est quam paupertas, paupertas enim potest esse honesta, nam egestas semper turpis est. |
186 | Inter Experientiam et scientiam. Experientia in malo dici potest, ut poenas expertus, scientia autem in bono tantum. |
187 | Inter Emittit et admittit. Emittimus alios a nobis, admittimus alios ad nos. Sic quidam virgini cuidam ait: Murum sexui tuo exstrue, qui nec tuos emittat oculos, nec admittat alienos. |
188 | Inter Existimare et arbitrari. Existimare apud animum nostrum est, arbitrari iudicium animi proferre. |
189 | Inter Emere et redimere. Id differt quia qui emit alienum emit, qui autem redimit, id emit proprie quod suum fuit, et suum esse desiit. |
190 | Inter Exspectare et spectare. Exspectatur venturus, spectatur qui videtur, vel approbatur. |
191 | Inter Efferunt et eferunt. Efferunt qui exportant, per duo ff. Eferunt autem, qui laudandum extollunt, per unum f. Cicero: Nimium fortasse haec illi eferunt. |
192 | Inter Exsequimur, persequimur et prosequimur. Exsequimur mortem, in qua vindicta est, persequimur fugientem, prosequimur, cum fungimur officio. |
193 | Inter Extemplo et illico. Extemplo, repente, vel statim, vel subito, illico, mox vel continuo. |
194 | Inter Exstinctum et restinctum. Exstinctum dicimus lumen, ut Cicero: Lumina civitatis exstincta sunt, restinctum vero incendium, ut idem Cicero: Subiectos prope iam ignes, circumdatosque restinximus. |
195 | Inter Equitem, equestrem et sequestrem. Sequestris dicitur, qui certantibus medius intervenit, per quem utraque pars aequam fidem sequatur. Eques autem est qui equo sedet in armis. Equestris vero locus, vel ordo, ut si dicas: Ille homo equestris est. Item: Militat ille in equestri ordine. |
196 | Inter Exanimem et exanimatum. Exanimis est mortuus, exanimatus vero timens. Ut est illud: Exanimata sequens impingeret agmina muris. |
197 | Inter Eu et heus. Eu interiectio dolentis est, heus adverbium vocantis. |
198 | Inter Ensem et gladium, Ensis est ferrum tantum, gladius vero totus. Mucro autem non tantum gladii, sed et cuiuscunque teli acumen est. Item gladium generaliter dicimus, ensem in praelio, mucronem in opere. |
199 | Inter Exuvias et spolia. Exuviae ducum sunt, spolia privatorum. |
200 | Inter eum qui in insulam relegatur, et eum qui deportatur, magna differentia est: primo, quod relegatum bona sequuntur, nisi fuerint sententia adempta, deportatum non sequuntur, nisi palam ei fuerint concessa. Ita fit, ut relegato, mentionem bonorum in sententia haberi, non prosit, deportato noceat. Item distant et in loci qualitate. Quod cum relegato quidem humanius transigitur, deportatis vero solent insulae assignari quae sunt asperrimae, quaeque sunt paulo minus summo supplicio comparandae. |
201 | Inter Eremum et desertum. Eremus est in via solitudo, ubi nunquam habitatum est, desertum ubi aliquando habitatum et derelictum est. |
202 | Inter Exsecrationem et iurationem. Exsecratio, ut puta: Si malum non patior; Iuratio: Si bonum mihi evenit. |
203 | Inter Expertum, et experrectum. Expertum, aliquid agnitum, experrectum a somno. |
204 | Inter En et em. En, cum ostendis, em, cum increpas. |
205 | Inter Ebrium et ebriosum. Ebrius ad tempus multum bibit, ebriosus semper multum bibit. |
206 | Inter Aequum et equum. Equus, quod est animal, per e et u. sola scribendum. Quod vero pro iusto scribitur per ae diphthongon geminata u u est scribendum. |